還吂搬來這隻庄頭的時節，屋主拜託鄰舍來清屋肚，棚頂盡多泥沙、花缽，還生一大po53介娘婆，佢兜費忒一朝晨介工夫正清好，該日我堵好落來看，看到一個生到盡矮的老人家，佬一介生到盡瘦又佝背、面烏烏的老人家di11該做細，做sot2以後，兩儕坐亭仔下食菸，捱佬佢兜講承蒙，佢兜有略略仔歹勢，毋多敢佬我講話樣。
後來捱正知，人細細隻介，安做阿光叔，面烏烏佝背介，安做錦浪叔。逐日朝晨，我上山頂行路，會經過佢兜屋家，上山gam11一擺頭，下山又gam11一擺頭，成時還會停下來打嘴鼓，待吂有兩個月，大自家變做當親切的鄰舍。
我發覺阿光叔屋下sii兩兄弟，無補娘人，無細喔仔，原來光叔無討bu53娘，因為爺哀還在介時節，阿爸發病，沒錢好醫，阿母講，討bu53娘的錢拿來分阿爸醫病。結果後來爺哀全無在咧，也沒想愛討，佢佬老弟就共下生活到今。
佢屋下盡闊，頭前後背無人屋，雖然單棧樓，捱看到sii係第一高級介別庄。
有一日，我行下山，阿光叔愛上山，就堵好攝到佢背腳頭的樣仔，後背毋知乍有出煙，歸隻庄頭像正睡啊醒，佢對按仰的庄頭行出來，像老頭擺的人愛上山做細。
佢毋會歹勢，盡自然分我攝，還停下來分我攝。
加幾日，我行去佢屋家頭前佬佢聊，佢佬捱講，頭擺待該頭前詹屋的泥屋，裡下新屋面前三夫田，旁唇一夫田，全係gia55介。
過沒兩日，就聽到佢佬錦浪叔去山頂改薑嬤，有食保力達摻水，毋知仰般形，一下氣透毋過就過身的消息。盡得人著驚。
隔壁阿出伯講，阿光叔人盡江湖，庄肚事情盡會老人滕手，有九十歲老人家送到竹東老人院，佢逐日下去看佢，佬老人家談聊。頭擺阿出伯的阿爸中風，阿光叔共樣逐日去尋他聊，盡惜老人家。可能係按仰，故所佢當好走，無麼介病痛。
阿光叔，慢行！
史料探討 (1)
